ပျံကျဈေးထဲက မုန့်ဟင်းခါးဆိုင်

          မနက်မိုးမလင်းသေးဘူး သည်ရပ်ကွက်လေးထဲမှာ စည်ကားနေပြီ။ ဆောင်းတွင်းဆိုတော့ လည်း နေ့တာတိုပြီး ညတာရှည်နေတော့ နံနက်(၆)နာရီဆိုတာ အရင်ရာသီတွေလိုမဟုတ်ဘဲ မှုန်ပျပျအလင်းရောင် လေးနဲ့ နှင်းမှုန်လိုလို မြူခပ်ဆိုင်းဆိုင်းရယ်ဆိုတော့ လွမ်းမောစရာလေး လိုဖြစ်နေတယ်။ ရန်ကုန်မြို့ကြီးရဲ့ အစိတ်အပိုင်းတစ်ခုစီဖြစ်တဲ့ မြို့နယ်တွေရဲ့ ရပ်ကွက်လေးတွေထဲမှာ မနက်(၃-၄)နာရီဆိုကတည်းက လှုပ်လှုပ်ရွရွ မဟုတ်လား။ အခြားသူဌေးရပ်ကွက်တွေလိုမဟုတ်ဘဲ ရပ်ကွက်လေးထဲက ပျံကျဈေးလေးရယ်။ အစိုးရက သတ်မှတ်ပေးထားတဲ့ အနည်းငယ်လမ်းလျှောက် ရင် ရောက်နိုင်တဲ့ သတ်မှတ်ဈေးတွေမှာ ဆိုင်ဖွင့်တဲ့ သူတွေမှာတော့ မနက်(၃-၄-၅)နာရီဆိုတာ အိပ်ရာ ထချိန်ဖြစ်နေတယ်။

          ကုန်စိမ်းရောင်းမယ့်သူက မနက်စောစောကုန်စိမ်းတွေသယ်တယ်။ လက်သုတ်စုံ(ခေါက်ဆွဲသုတ် ၊ ကြာဇံသုတ်) ရောင်းမယ့်ဆိုင်တွေကတော့ အစောကတည်းက ဟင်းခါးတွေ ဘာတွေညာတွေ ချက်ပြုတ်ကြော် လှော်နေကြတယ်။ ဈေးသည်မဟုတ်တဲ့ အိမ်ရှင်မတွေလည်း မနေသာဘူး မနက်စောစော လာတဲ့ ပဲပြုတ်သည် ကိုစောင့်ရတယ်။ မနက်ခင်းစောစော ကျောင်းသွားရမယ့် ကလေးတွေအတွက် ထမင်း ချိုင့်ထည့်ပေးရမယ် မဟုတ်လား….။ အချို့ချွေတာတဲ့သူတွေကျတော့လည်း ညဘက်လက်ကျန်ထမင်းကြမ်း လခဲလေးကိုချေပြီး ပဲပြုတ်(၁၀၀)ဖိုးလောက်ဝယ် ဆီအနည်းငယ်နဲ့ လှိမ့်ပြီးမိသားစု မနက်စာဆိုတာ ပြီးသွားကြတာပဲလေ။ အချို့တွေကလည်း မနက်စောစောစီးစီးကို ထမင်းမစားချင်ဘူးဆိုပြီး လက်သုတ် စုံလေးကို ဟင်းခါးလေးနဲ့ သောက်လိုက်ရမှ မုန့်ဟင်းခါးလေးကို ပူပူလေးစားလိုက်ရမှ ကျေနပ်တဲ့ သူတွေကတော့ ဈေးကြီးထဲကို ပြေးချင်ပြေး ၊ မပြေးချင်ရင်တော့ ပျံကျဈေးထဲမှာရောင်းတဲ့ လက်သုတ်စုံဆိုင် ၊ မုန့်ဟင်းခါးဆိုင်တွေကို ပြေးကြရတာပဲလေ..။

                             **************************************

          မနက်ခင်းနေလေးက မြင့်လာတာနဲ့အမျှ ဆောင်းတွင်းရဲ့မနက်ခင်းရဲ့ မြူမှုန် ၊ နှင်းမှုန်လေးတွေ က ပြယ်စပြုလာပြီ။ ရပ်ကွက်လေးထဲက ပျံကျဈေးတန်းကလေးကလည် အသက်ဝင်လာတယ်။ ကုန်စိမ်းသည်တွေ ကလည်း အဆင့်သင့်ခင်းကျင်းပြီးပြီ။ လက်သုတ်စုံ ၊ မုန့်ဟင်းခါးဆိုင်တွေကလည်း အားလုံးအဆင့်သင့်ဖြစ်နေ ပြီ။ ကုန်ခြောက်ဆိုင်နီးနီး ဆိုင်လေးတွေကလည်း ဘုရားပန်းတွေပူဇော်ပြီး အမွှေးတိုင်တွေဘာတွေ ထွန်းနေကြပြီ။ ရပ်ကွက်ထဲက တစ်အိမ်စနှစ်အိမ်စကလည်း ဘုန်းကြီးတရားခွေ ၊ မင်္ဂလာမနက်ခင်းတေးသံသာ တွေ ဖွင့်နေကြပြီ။ ကျောင်းသားတွေရှိတဲ့အိမ်မှာတော့ အပြေးအလွှားကျောင်း မီအောင် ရှုပ်ယှက်ခက် နေကြတယ်။ ဒီလိုနဲ့ပဲ ရပ်ကွက်လေးတစ်ခုရဲ့ နံနက်ခင်းကပီပြင်လာတယ်…။

          မနက်မိုးလင်းလို့ အိပ်ရာထပြီးဆိုတာနဲ့ လူတိုင်းကမျက်နှာသစ်၊သွားတိုက် သွားတိုက်ဆေးမ၀ယ်နိုင် တဲ့ အိမ်တွေမှာတော့ ဆားနဲ့တိုက်ကြတာပေါ့…။ သန့်ရှင်းရေးကိစ္စတွေပြီးသွားတော့ ဗိုက်ထဲက ဆန္ဒပြလာပြီ။ ဆာလောင်တာတွေဖြေသိပ်ဖို့ အိမ်မှာကျန်တဲ့ထမင်းကြမ်းခဲကို ငါးပိရည်လေးနဲ့ ဆွဲတဲ့သူက ဆွဲလိုက်ကြတယ်။ ဒါမှမဟုတ် ပဲပြုတ်လေးနဲ့ကြော်ပြီး ဆွဲရင်ဆွဲလိုက်မယ်…။ သည်ရပ်ကွက်ထဲကလူတွေ အများစုကတော့ ပျံကျဈေးလေးထဲက မုန့်ဟင်းခါးဆိုင်လေးကို ပြေးကြတာပါပဲ။ ပျံကျဈေးလေးထဲက မုန့်ဟင်းခါးဆိုင်လေးက တော့ ထူးခြားမှုတစ်ခုတော့ရှိတယ်။ ဘယ်ဆိုင် ဘယ်နေရာမှာမှမရတဲ့ ဈေးနှုန်းနဲ့ အဲသည်ဆိုင်မှာ ၀ယ်စားနိုင်တယ်။ ဒါကြောင့်လည်း ဒီအနီးနားပတ်ဝန်းကျင်က လူတွေက နံနက်ခင်းဆို ပျံကျဈေးထဲက မုန့်ဟင်းခါးဆိုင်လေးကိုပဲ အပြေးလားကြတယ်။

          ရေထိုးတဲ့ကြက်သားလား ၊ အလေးခိုးတဲ့ငါးသည်လား ၊ ၀က်သားသည်လား ၊ မနေ့တစ်နေ့ ကကျန်တဲ့ ဟင်းသီးဟင်းရွက်တွေကို အပုံဈေးနဲ့ရောင်းတဲ့ ဟင်းရွက်သည်လား။ စံပယ်ကုံးတစ်ရာ ခုနှစ်ကုံးလိုလို နှစ်ကုံးလိုလို မပီကလာပီကလာ အသံနဲ့လှည့်နေတဲ့ စံပယ်ပန်းသည်လား။ အားလုံးနီးပါး အဲသည်မုန့်ဟင်းခါး ဆိုင်လေးကပဲ ၀ယ်စားအားပေးကြတယ်။ ရပ်ကွက်ထဲက အိမ်ရှင်မတွေ ဈေးဝယ်ပြီး အပြန် ဟာနေတဲ့ဝမ်းတွေကို မုန့်ဟင်းခါးဆိုင်လေးမှာပဲ ဖြည့်တင်းသွားတယ်။ မအားလပ်လို့ ဟင်းမချက်နိုင် တဲ့အလုပ်သမားတွေ မုန့်ဟင်းခါးဆိုင်လေးမှာ လက်သုတ်စုံပါရတော့ ထမင်းချိုင့်အဖြစ်လည်း ထည့်သွားကြ တယ်..။ မကြီးကျယ် မခမ်းနားတဲ့ သည်မုန့်ဟင်းခါးဆိုင်လေးဝန်းကျင်မှာရော ဘာကြောင့်တခြားဆိုင်မရှိတာ လဲ။ အလွယ်လေးပါ….။ သူ့ကိုမယှဉ်နိုင်လို့ပေါ့…..။

                             *************************************

          ပျံကျဈေးလေးထဲက မုန့်ဟင်းခါးဆိုင်လေးမှာ ၀င်စားမယ်ဆိုရင် ၀၀ဖိုင့်ဖိုင့်နဲ့ မိန်းမအပျိုကြီး တစ်ယာက်ရောင်းနေတာတွေ့ရလိမ့်မယ်။ ရပ်ကွက်လေးထဲမှာ တစ်ကိုယ်တည်းအပျိုကြီးဘ၀နဲ့ မုန့်ဟင်းခါး ရောင်းစားနေတာ သူတစ်ယောက်ပဲရှိတယ်။ ရပ်ကွက်ထဲက “မတင်တင်” ဆိုမသိတဲ့သူမရှိဘူး။ သူရောင်းတဲ့ ပုံကိုလည်းကြည့်လေ အသုတ်တစ်ပုံ(၅၀)ကျပ် ၊ မုန့်ဟင်းခါးတစ်ပွဲ(၅၀)ကျပ်။ ရပ်ကွက်ထဲမှာ နေတဲ့အခြေခံ လူတန်းစားတွေက တစ်ပုံကြီးရယ်။ ကလေး(၄-၅)မွေးထားတဲ့မိသားစုဆို တစ်ယောက်စီကို တစ်ယောက်(၅၀)ကျပ်ပေးလိုက်ရုံပဲ။ ကလေးကအိမ်က ထမင်းကြမ်းလေးယူပြီး လက်သုတ်တစ်ပုံ ၊ ဒါမှမဟုတ် မုန့်ဟင်းခါးတစ်ပွဲနဲ့ ဆွဲလိုက်ရင် ဗိုက်ပြည့်ပြီလေ။ တစ်ပွဲ(၅၀)ကျပ်ဆိုလို့ လည်း အရသာမရှိဘူးမထင်နဲ့။ လက်သုတ်စုံဆိုလည်း  ဆီချက်လေး ၊ ငရုတ်ဆီလေး ၊ ငံပြာရည်လေး ၊ နံနံပင်မွှေးမွှေးလေးနဲ့ သူ့အစပ်အဟပ် နဲ့သူ စားကောင်းတာပဲ။ မုန့်ဟင်းခါးဆိုလည်း ငှက်ပျောအူ ဖတ်လေးတွေနဲ့ အရည်ကျဲကျဲချိုချိုလေးဆိုတော့ နံနက်ဆို သူ့ဆိုင်လူအုံနေတာပေါ့…။

“ခေါက်ဆွဲသုတ် လေးပုံပေးပါ…”

          ပန်းကန်ပြားလေးတစ်ခုနဲ့ ရောက်လာတဲ့ ကလေးတစ်ယောက်ကို မတင်တင်ကြည့်လိုက်တယ်။ ဒါသူ့ဖောက်သည်ပဲ။ ယူလာတဲ့ပန်းကန်ပြားပေါ်မှာ ခေါက်ဆွဲလေးပုံကို တညီတညာပုံ ဆီချက်၊ငရုတ်ဆီ၊ ငံပြာရည်၊ပဲမှုန့်၊ငရုတ်သီးမှုန့်၊အချိုမှုန့်နဲ့ နံနံပင်လေးအုတ်ပြီးပြီ။ တစ်ပုံကို(၅၀)ကျပ် လေးပုံဆိုတော့ (၂၀၀)။ ပြီးဟင်းရည်သောက်ဖို့အတွက် မုန့်ဟင်းခါးအရည် ကျွတ်ကျွတ်အိတ်နဲ့ ထည့်ပေးလိုက်တယ်။ ဒါတောင်ကလေးက ပါးစပ်ကတတွတ်တွတ်ပြောနေသေးတယ်..။

“မေမေက ဟင်းရည်ပိုထည့်ပေးပါတဲ့……”

          ကလေးပြောတာ မတင်တင်မကြားသလိုကြားသလိုပါပဲ သူထည့်နေကျအတိုင်းပဲ မုန့်ဟင်းရည် ကိုထည့်ပေးလိုက်တယ်။ ဆိုင်မှာထိုင်စားတဲ့လူနဲ့ မတင်တင်ဆိုင်ကတော့ အုံခဲလို့…။

“မုန့်ဟင်းခါးတစ်ပွဲပေးပါဟေ့…..”

          လူမရောက်သေးဘူး အသံကရောက်နှင့်နေတဲ့ မသေးကွေးဆိုတဲ့ မိန်းမအသံ။ မသေးကွေးသာ ဆိုတယ် လူကြည့်တော့လည်း ၀တုတ်လို့။ ၀တုတ်နေမှာပေါ့ မတင်တင်ဆိုင်မှာ မသေးကွေးဘယ်လိုစား တယ်ဆိုတာ မတင်တင်ပဲအသိ။ သူလာစားပြီးဆို ဘယ်ကဘယ်လိုဝယ်လာမှန်းမသိတဲ့ မုန့်ဟင်းခါး ဖတ်တစ်ထုပ်ပါတယ်။ ပြီးရင် မတင်တင်ဆီက မုန့်ဟင်းခါး(၅၀)ဖိုးဝယ်စားမယ်။ မတင်တင်ထည့်ပေးလိုက်တဲ့ မုန့်ဟင်းခါးခွက်ထဲကို သူဝယ်လာတဲ့ မုန့်ဖတ်တွေထည့်မယ်၊ မွှေမယ်ပြီးရင် ဟင်းရည်ကိုအထပ်ထပ် အခါအခါတောင်းမယ်။ ခုလည်း မသေးကွေးလက်ထဲမှာ မုန့်ဖတ်ထုပ်ကပါလာပြီ။ မတင်တင်ကတော့ ဟင်းရည်တောင်းရင် မသိမသာ ပညာသားပါပါ ဟင်းရည်ဇွန်းခွက်ကို ခပ်ပြီးခပ်နည်းနည်းပြန်ပြန်သွန်ပြီး မသေးကွေးပန်းကန်ထဲကို နည်းနိုင်သမျှ နည်းအောင် ပညာသားပါပါ ထည့်ပေးရဦးမယ်။

                   ***********************************************

          မသေးကွေးရဲ့နောက်မှာ ကပ်ပါလာတဲ့လူတစ်ယောက်ကို မတင်တင်တွေ့တွေ့ချင်းပဲ စားပွဲပေါ်က ငရုတ်သီးမှုန်ခွက်ကို စားပွဲအောက်ထဲကောက်သိမ်းလိုက်တယ်။ မတင်တင်မျက်လုံးမှာ စိုးရိမ်တဲ့အငွေ့ အသက် တွေနဲ့။ ကိုယ်တွေ့ခံစားဖူးတော့လည်း မတင်တင်ခမျာ မျက်စိလျင်မှကိုး။ မတင်တင်ကြောက် လန့်နေတဲ့ တစ်ယောက်ကိုကြည့်လိုက်တော့လည်း မိန်းကလေးခပ်ငယ်ငယ်တစ်ယောက်ပါပဲ။

“မုန့်ဟင်းခါးတစ်ပွဲပေးပါ….”

          ကောင်မလေးက မုန့်ဟင်းခါးမှာလိုက်တော့ မတင်တင်မုန့်ဟင်းခါးကို ပြင်ဆင်ပေးလိုက် တယ်။ ကောင်မလေးက မုန့်ဟင်းခါးခွက်ရရချင်းပဲ တစ်ခုခုကိုရှာလိုက်တယ်။ ကောင်မလေးမျက်လုံးက သူရှာနေတဲ့ အရာတွေ့သွားသလိုပဲ မျက်လုံးကအရောင်လက်သွားတယ်…။ မတင်တင်သိမ်းဖို့ကျန်သွားတဲ့ ငရုတ်သီးမှုန့် တစ်ခွက်ပါပဲ….။ မတင်တင်မျက်လုံးတွေကတော့ ငရုတ်သီးမှုန့်ခွက်ကလေးကို သနားတဲ့ ပုံစံနဲ့ကြည့်နေတယ်။ ကောင်မလေးကတော့ ငရုတ်သီးမှုန့်ခွက်ကိုကောက်ကိုင်ပြီး သူ့ပန်းကန်ထဲကိုထည့်ချ လိုက်တဲ့ ငရုတ်သီးမှုန့်ပမာဏက မတင်တင်မုန့်ဟင်းခါးတစ်ပွဲစာမကဘူး တစ်ပန်းကန်လုံးကို ရဲပလောင်း ခတ်သွားတာ။ ကောင်မလေးစားပြီးထွက်သွားတော့ မတင်တင်နှုတ်ဖျားက ပွစိပွစိနဲ့ ဘာတွေပြောနေမှန်း ကိုမသိဘူး။ ကောင်မလေးကို ကျိန်ဆဲတာလည်း ဖြစ်ချင်ဖြစ်မှာပေါ့…။

“တင်တင်ရေ မုန့်ဟင်းခါးတစ်ပွဲပေးဟေ့…..”

          အသံကြားကြားချင်ပဲ မတင်တင်ထည့်ထားတဲ့ မုန့်ဟင်းခါးကအသင့်ဖြစ်နေပြီ။ အခုတစ်ခေါက်ထည့် တဲ့ မုန့်ဟင်းခါးကတော့ အခြားသူတွေထက်ပိုများနေသလိုပဲ။

“ကဲရော့ မိဇင်……  ညည်းကျုပ်အတွက်ချန်ထားဦးနော်….”

“အေးပါဟယ်..ကျုပ်ပစ္စည်းတွေညည်းအတွက်ပါပဲ..”

          သူတို့နှစ်ယောက်ဘာတွေပြောနေမှန်းမသိပါဘူး….။ အတိုင်အဖော်ကိုညီလို့ အဲသည်မိန်းမစားပြီး ဟင်းရည်ထပ်တောင်းတော့လည်း မတင်တင်ထည့်ပေးလိုက်တဲ့ ဟင်းရည်က အခြားသူထက်ကိုများနေ တာ..။ ဟင်းရည်သောက်ပြီး မုန့်ဟင်းခါးစားပြီးသွားတော့လည်း မတင်တင်ကိုပိုက်ဆံပေးမသွားဘူး။ မတင်တင်ကတော့ ပြုံးပြုံးပဲ။

“အန်တီ… အသုတ်(၆)ပုံပေးပါ….”

“ဟဲ့ ညည်းကများလှချည်လား…”

“သမီး…တို့မောင်နှမတွေစားဖို့ပါ…”

          ကောင်မလေးပြောလိုက်တဲ့စကားရဲ့နောက်ကွယ်ကို မတင်တင်မျက်လုံးတွေက သိနေသလိုလိုပဲ။ သူ့မျက်လုံးတွေက လှောင်နေသလိုလို၊ ဂုဏ်ယူနေသလိုလို။ ကောင်မလေးထွက်သွားပြီးတော့ မတင်တင် ပြောလိုက်တဲ့စကားကြားလိုက်မှပဲ အကုန်လုံးနားလည်တော့တယ်..။

“သူဌေးတွေများ…. ဈေးပေါတဲ့ဟာဆို ၀ယ်စားရမှာရှက်နေလိုက်တာ အိမ်မှာခိုင်းတဲ့လူကို ၀ယ်ခိုင်းရတာနဲ့ ဘာနဲ့…. မသိဘူးများမှတ်နေတယ်..။ ငါ့အသုတ်ကောင်းလို့ ၀ယ်ခိုင်းနေတာများ… ”

                             ******************************************

          မတင်တင်ရဲ့ဆိုင်နားမှာတော့ ကျွတ်ကျွတ်ကိုညံလို့။ ကြက်သားရေထိုးတာကို မိသွားတဲ့သူရဲ့ ကျိန်ဆဲနေတဲ့စကားသံတွေ။ အလေးမှန်တယ်ဆိုတဲ့ ငါးသည်ရဲ့အသံတွေ။ ဟင်းရွက်တွေလတ်ပါတယ်ဆိုတဲ့ ဟင်းရွက်စိမ်းသည်အသံတွေ။ မတင်တင်ရဲ့ မုန့်ဟင်းခါးအိုးကြီးကတော့ တဖြည်းဖြည်းလျော့လာ ပြီ။ နေလည်း မြင့်လာလေလေ ပျံကျဈေးထဲမှာလည်း လူတဖြည်းဖြည်းပါးလာပြီ။

“ဖုတ်…..”

          အသံကြားတော့ မတင်တင်လှည့်ကြည့်တယ်…။ သူ့ဖောက်သည်တစ်ယောက်ပဲ။ ဒါပေမယ့် သူက၀ယ်ရမယ့်ဖောက်သည်ပေါ့…။

“ဟဲ့ကောင်လေး ဘယ်လောက်လဲ…”

“နှစ်ရာ့ငါးဆယ်ပဲ ပေးပါအန်တီ…”

“နင်ကလည်း နှစ်ရာပဲထားပါ…. လယ်ကွင်းထဲက အလကားခုတ်လာတာကိုး…”

“ဒါဆိုလည်း မုန့်ဟင်းခါးတစ်ပွဲပေး….. တစ်ရာ့ငါးဆယ်ပဲပေးတော့။ မုန့်ဟင်းခါးတော့ ပိုထည့်ပေးနော်..”

“အေးပါဟယ်..ကိုယ့်ဖောက်သည်တွေပဲ”

          မတင်တင်ထည့်ပေးလိုက်တဲ့… မုန့်ဟင်းခါးကို ကောင်လေးငုံ့ပြီးစားလိုက်တယ်။ မုန့်ဟင်းခါးခပ် ကျဲကျဲ ထဲမှာ သူရောင်းတဲ့ ငှက်ပျော်အူဖတ်လေးတွေကဝေစီလို့။မတင်တင်လည်းဆိုင်သိမ်းဖို့ အချိန်ရောက်ပြီး ဈေးထဲမှာလည်း လူမရှိသလောက်ပါးသွားပြီ။ ဆိုင်ထဲကပစ္စည်းတွေ သိမ်းစရာရှိတာသိမ်းပြီး ငါးသည်ဖက်ကို ထွက်ပြီး ငါးထွက်ဝယ်တယ်…။

“မိဇင်…ငါ့အတွက်ပေးဦး..”

“အေး…ရော့ငါးဆယ်သား…ငါပိုပိုသာသာထည့်ပေးထားတယ်နော်…”

“အေးပါဟယ်…”

          မိဇင်ပစ်ပေးလိုက်တဲ့ ငါးအရိုးတစ်ထုပ်ကို မတင်တင်ဆွဲယူလိုက်တယ်။ ပြီးတော့ ကော့ကော့ ကော့ကော့နဲ့ထွက်သွားတယ်..။ မတင်တင်ငါးအရိုးထုပ်ဆွဲသွားတာကို ကြည့်နေတာ က မိဇင်…။ ကြည့်နေရင်းနဲ့ မတင်တင်မုန့်ဟင်းခါးလေးကို မိဇင်စားချင်လာပြန်ရော…။ နောက်တစ်နေ့ မနက်ကျရင်တော့ မိဇင်တစ်ယောက် မတင်တင်ဆီကမုန့်ဟင်းခါးကို စားရဦးမယ်…။ ငါးရိုးတွေချန် ထားပေးတဲ့အတွက် အလကား စားရမှာလေ….။

စူးရှ

တနင်္ဂနွေ ၊ ဇန်န၀ါရီ ၁၅ရက် ၂၀၁၂ခုနှစ်။

ည ၁၁နာရီ ၅၈မိနစ်။